Алматы вокзалында вагон өртенуіне байланысты қызметтік тексеру жүргізіледі
АСТАНА. ҚазАқпарат - Алматы вокзалында жолаушылар вагонының өртенуіне байланысты қызметтік тексеру жүргізіледі. Бұл туралы «Жолаушылар тасымалы» АҚ-ынан мәлім етті, деп хабарлайды ҚазАқпарат.
«2017 жылдың 19 қаңтарында Алматы стансасының техникалық паркі аумағында есептен шығарылған вагоннан түтін шықты. Зардап шеккендер мен қаза тапқандар жоқ. 1979 жылы 9 қарашада жасалған вагон техникалық жағдайына байланысты пайдаланылудан шығарылып, кәдеге жаратуға дайындалып жатқан», - делінген компания ақпаратында.
«Таратылған ақпаратқа қарағанда, жолаушылар вагонының орташа пайдаланылу мерзімі 28 жылды құрайды. Оқиғаның орын алуы себебі анықталуда. Қызметтік тексерістің қорытындысында сәйкесінше шаралар қабылданатын болады», - деп атап өткен компаниядан.
Айта кетейік, бұған дейін Алматы-2 темір жол вокзалында жолаушылар вагоны өртенгенін хабарлаған болатынбыз.
