Алматыда 2 мың аялдама табломен жабдықталады – Ерболат Досаев
АЛМАТЫ. ҚазАқпарат – Алматыда аялдама кешендеріне табло орнатылады. Бұл туралы қала әкімі Ерболат Досаев Жетісу ауданы тұрғындарымен кездесуі барысында айтты, деп хабарлайды ҚазАқпарат тілшісі.
Қала әкімімен кездесуге келген Жетісу ауданының тұрғыны қаладағы аялдамалар мәселесіне тоқталды.
«Қоғамдық көлікті жиі пайдаланушы ретінде қоғамдық көлікті бақылайтын табло орнатуыңызды сұраймын»,- деді аудан тұрғыны.
Ерболат Досаев аялдама кешендерін табломен жабдықтау үшін бюджеттен ақша бөлінетінін айтты.
«Қала аялдамаларына таблоларды 2023 жылдан бастап қоямыз. Келесі жылы 2 мыңдай табло орнатуды жоспарлап отырмыз. Бюджеттен ақша дайындап қойдық. «Оңай» траспорттық холдингімен қосылып, автобустардың жүру кестесін, нөмірлерін таблоға енгіземіз»,- деді шаһар басшысы.
Бұған дейін Ерболат Досаев Алматыдағы аялдамалар стандартталатынын айтқан болатын.
