Алматыда 2024 жылға қарай балаларды тегін қосымша біліммен қамту деңгейі 85% жетеді – Әсем Нүсіпова
АЛМАТЫ. ҚазАқпарат - Алматыда Мемлекет басшысы жұмыс сапарымен барған Оқушылар сарайында 11 бағыт бойынша 175 үйірме жұмыс істеп тұр. Бұл туралы Алматы қаласы әкімінің орынбасары Әсем Нүсіпова өзінің Facebook парақшасында жазды, деп хабарлайды ҚазАқпарат тілшісі.
«Оқушылар сарайын жаңғыртудың бірінші кезеңі аяқталды. Ол жаңа инновациялық ғылыми-техникалық бағыттарды іске қосу арқылы өз қызметін кеңейтті. Мысалы, алматылық оқушылар үшін Ракета жасау орталығы мен Аэроцентр, планетаны зерттеу, VR және дронмен басқару зертханасы, физика, химия, биология және гидропоника, робототехника, IT бағдарламалау бойынша ғылыми зертханалар сияқты салаларда 25 жаңа үйірме ашылды. Бүгінгі таңда 10 мыңға жуық баланың өз қызығушылығы бойынша үйірмелерге, және секцияларға қатысу мүмкіндігі бар.
Қолданыстағы Оқушылар сарайын жаңғырту жұмыстары белсенді түрде жалғасатын болады. Биылғы жылдың екінші кезеңінде үлкен концерт залы, қысқы бақ пен музыка бөлімі қайта жөндеуден өтеді. Обсерваторияны қайта құру үшінші кезеңге – 2023 жылға жоспарланған, өйткені, сейсмикалық күшейту бойынша тыңғылықты жұмыстар мен мемлекеттік сараптама қажет, оған дайындық шаралары басталып кетті», - деді Әсем Нүсіпова.
Сондай-ақ ол Мемлекет басшысына қаладағы қосымша білім берудің басқа да бағыттарының дамуы туралы қысқаша хабардар еткенін жазды.
«Мәселен, қазіргі таңда жергілікті бюджет есебінен Алатау, Наурызбай ауданында екі заманауи инновациялық шығармашылық орталық салынып жатыр. Бүгінгі таңда мектептегі спорт алаңдарын қайта жаңғырту жұмыстары жүргізілуде, бұл мақсатқа 1 млрд теңге бөлінді. Әкімдік жас натуралистер станцияларын жаңғыртуға дайындалуда. 2023 жылы 3 оқушының үйін жөндеу жұмыстары жоспарланып отыр, қазіргі уақытта жобалау жұмыстары жүргізілуде. Сонымен қатар, қосымша білім беруге мемлекеттік білім беру, шығармашылық және спорттық тапсырыстар орналастырылды (осы жылы жоспарланған балаларды қамту 150 000, бұл мектеп оқушыларының жалпы санының 50%). Қабылданған шаралардың арқасында біз 2024 жылға қарай балаларды тегін қосымша біліммен қамтуды 85% жеткізуді жоспарлап отырмыз»,- деді қала әкімінің орынбасары.
Оның айтуынша, Мемлекет басшысы Оқушылар сарайында биология және нейротехнология, гидропоника, 3D модельдеу және робототехника зертханаларын, сондай-ақ, анимация, дыбыс жазу және білім беру медиа жобаларына арналған студияларды аралады.
«Мемлекет басшысы балаларымыздың жаттықтырушылар мен ұстаздарының деңгейін жоғары бағалады. Мысалы, биотехнология үйірмесін Мәскеу физика-техникалық институтының түлегі Тимур Берғалиев жүргізеді. Ол Мемлекет басшысына студенттермен сабақтың үзіндісін көрсетті, сабақ барысында ол адам биосигналдарын өңдеу және интерпретациялау негіздері туралы айтты. Медицинада, спортта, адам денсаулығын бақылауда, протездеу технологияларында, реабилитацияда қолдануға болады.
Алматыдағы жастар робототехника қозғалысының жетекшісі Владимир Райс ерікті жаттықтырушы болып табылатын 3D прототиптеу зертханасының сабағы да Мемлекет басшысына үлкен әсер қалдырды.
Сабақтарда балалар 3D басып шығару үшін оңтайландырылған үлгілерді жасау процестерін үйренеді. Нәтижесінде балалардың ауқымды ойлауы мен жобалау дағдылары дамиды.
Мұнда балалар Arduino – әлемдік стандартты платформа негізіндегі робототехниканы да оқиды. Ол балалардың электроника негіздерімен танысуын және DIY қауымдастығына қатысуын жеңілдету үшін арнайы жасалған.
Сондай-ақ Мемлекет басшысы жыл мұғалімі – Дарын Сайыновпен сөйлесті, ол физика пәнінен жаңа форматтағы дәрістің үзіндісін сенсорлық экран мен электронды «ассистенттерді» – суфлер, экрандар арқылы өте қолжетімді түрде оқыды, әртүрлі графиктерді, формулаларды және сілтемелерді жүктеп алуға болады»,- деді қала әкімінің орынбасары Әсем Нүсіпова.
Еске салсақ, Мемлекет басшысы жұмыс сапарының бағдарламасына сәйкес Алматы қаласындағы Оқушылар сарайына барды.
