Алматыда 44 көпбалалы отбасы тұрғын үй сертификатын алды
АЛМАТЫ. ҚазАқпарат - Алматы әкімдігі 44 көпбалалы отбасыға жеңілдікпен тұрғын үй алуға мүмкіндік беретін 1 млн теңгелік сертификат табыс етті, деп хабарлайды ҚазАқпарат тілшісі.
«Бақытты отбасы» бағдарламасына сәйкес, бұл қаражат алғашқы салымды төлеуге бағытталады.
Аталған отбасылардың көпшілігі «Үш сұңқар», «Атлас», «Меркур-град», «Радужный берег», «Адиет» ТК таңдады. Баспана туралы келісімшарт жасалған соң бұл отбасылар жаңа үйлеріне көшетін болады.
Қалалық әлеуметтік әл-ауқат басқармасының хабарлауынша, қаржы салымшылардың банктегі шоттарына аударылды.
Айта кетсек, baqytty-otbasy.kz порталында 1,5 мың өтінім түскен. Олардың 345-і банкке құжат тапсырып, 301 өтінім мақұлданды. «Бакытты отбасы» аясында отбасыларға жылына 2% мөлшермен пәтер беріледі.
