Алматыда 6 зертханада коронавируске тест тапсыруға болады
АЛМАТЫ. ҚазАқпарат – Алматыда коронавирус инфекциясын анықтайтын зертханалар саны екі есеге көбеймек, деп хабарлайды ҚазАқпарат тілшісі.
Қалалық Тауарлар мен қызметтердің сапасы мен қауіпсіздігін бақылау департаментінің басшысы Айзат Молдақасымованың айтуынша, жақында Алматыда тағы 3 зертхана коронавирус инфекцияларын анықтауға көшеді.
«Бізде егер бұған дейін 3 зертхана жұмыс істеп тұрса, олардың қатарына тағы 3 зертхана қосылады. Олардың бірі Корея мен Қазақстанның бірігіп ашқан жекеменшік зертханасы. Бұл ұйымның арнайы рұқсат құжаттары бар. Сондай-ақ, «Олимп» клиникалық диагностикалық зертханасының (КДЗ) да арнайы рұқсаты бар. Сосын ЖИТ (СПИД) орталықтың лабораториясы қосылатын болды», - деді онлайн брифинг барысында департамент басшысы Айзат Молдақасымова.
Оның айтуынша, «Олимп» КДЗ бірнеше күннен соң жұмысқа кіріседі. Ал корея-қазақстандық компания жұмыс істеп жатыр. ЖИТС орталық жұмыс материалдарын жеткізу бойынша келісімшарт жүргізіп жатыр.
