Алматыда 62 жастағы ер адамнан есірткі мен тапанша табылды
Алматы қалалық полиция департаменті баспасөз қызметінің мәліметіне сүйенсек, Есірткі қылмысына қарсы іс-қимыл басқармасының қызметкерлері жедел-іздестіру шаралары барысында Наурызбай ауданының 62 жастағы тұрғынының ұстады.
«Сараптамаға сәйкес, арнайы іс-шаралар кезінде алынған зат – гашиш есірткісі. 62 жастағы А.есімді азамат ұсталды. Күдіктінің тұрғылықты жерінде рұқсат етілген тінту кезінде өсімдік тектес және ерекше иісі бар бірнеше полиэтилен орамдары табылды және тәркіленді: дәлізден 15 бума, шкафтан 11, тағы 9-ы көлікте жасырылған. Сондай-ақ, үйден газ тапаншасы табылды», – деді Алматы қалалық ПД Есірткі қылмысына қарсы күрес басқармасы бастығының орынбасары Сағындық Аяғанов.
Полиция өкілінің айтуынша, күдікті есірткі сатқанын мойындаған.
Аталған дерек бойынша ҚР ҚК-нің 297-бабы 1-бөлігі бойынша қылмыстық іс қозғалды.
Күдікті уақытша ұстау изоляторына қамалды.