Алматыда 80 млн теңгенің электронды темекісі тәркіленді

АСТАНА. ҚазАқпарат - Қаржылық мониторинг агенттігінің Алматы қалалық департаменті қала прокуратурасының үйлестіруімен көтерме саудада электронды темекіні (вейп) заңсыз өткізудің жолын кесті, деп хабарлайды ҚазАқпарат.

«Жедел-іздестіру іс-шаралары барысында мегаполисте электронды темекіні көтерме саудада заңсыз өткізуге арналған сауда және қойма ғимараттары анықталды.

Тінту кезінде жалпы сомасы 80 млн теңгеден асатын 55 мыңнан астам электронды темекі табылып, тәркіленді. Қазіргі уақытта сотқа дейінгі тергеу басталды», - делінген ҚМА мәліметінде.

ҚР Қылмыстық-процессуалдық кодексінің 201-бабы алға тартылып, өзге мәлімет жария етілмеді.

ҚМА вейптерді қолдану жасөспірімдердің дамуына кері әсерін тигізетінін ата-аналардың есіне салып өтті. Сондай-ақ баланың мінез-құлқына, денсаулығына және оның жасаған саудасына мән беруді ескертті.