14:30, 12 Сәуір 2022 | GMT +5
Алматыда 84 мыңнан астам ағаш шіріген, қауіпті жағдайда тұр
АЛМАТЫ. ҚазАқпарат – Алматы қаласында 2,8 млн жасыл желек болса, 84 мыңы жарамсыз, шіріп, құлағалы тұр. Бұл туралы қалалық жасыл экономика басқарма басшысының міндетін атқарушы Серік Әділбаев айтты, деп хабарлайды ҚазАқпарат тілшісі.

«Қалада 2 809 183 ағаш пен бұта бар. Оның ішінде сау ағаш – 1 946 234, кәрі ағаш – 360 309, жас өскіндер – 418 012 және құлағалы тұрған 84 628 ағаш бар», - деді басқарма басшысы.
Оның айтуынша, адам өміріне, денсаулығына, мүлкіне қауіп төндіретін өзегі шіріген жасыл желектердің басым бөлігі қаланың орталығында өсіп тұр. Көше бойында – 34 962, аулаларда – 49 666 ағаш бар.
«Жыл сайын аудандық әкімдіктерге 1,9 мың ағаш кесуге және оның орнына міндетті түрде 19 мың түп ағаш отырғызу үшін 54 млн теңге бөлінеді», - деді спикер.
Сонымен қатар, ол қаладағы барлық апатты ағаштарды кесу бағдарламасы жасалып жатқанын тілге тиек етті.
Әр кесілген талдың орнына 10 көшеттен отырғызылады.