Алматыда 9 айда 94 қала тұрғыны теріс діни ағымның ықпалынан құтылған
АЛМАТЫ. ҚазАқпарат - Алматыда 9 айдың ішінде 94 қала тұрғыны деструктивті теріс ағымның ықпалынан құтылған. Бұл туралы Алматы қаласы дін істері жөніндегі басқарма басшысының орынбасары Ерғали Көшеке баспасөз мәслихатында, айтты деп хабарлайды ҚазАқпарат.
Алматыда 2016 жылдан бастап ақпараттық түсіндіру тобы жұмыс істейді. Оның құрамында дін саласындағы 41 білікті маман кірген. Олар: тарихшылар, дінтанушылар, исламтанушылар, заңгер, философ, психологтар, және дін сарапшылар.
«Оңалту жұмыстары бойынша биылғы 9 айдың ішінде 94 қала тұрғыны деструктивті теріс діни ағымның ықпалынан құтылып, дәстүрлі ислам дініне оралды. Сондай-ақ, Алматыда 184 діни бірлестік, 115 діни ғимарат жұмыс істейді, сондай-ақ 64 миссионер тіркелген»,- деді Ерғали Көшеке.
Оның айтуынша, Алматыда бүгінде 4 діни оқу орны жұмыс істейді. Олар: «Нұр Мүбарак» университеті, Имамдардың біліктілігін арттыру институты, «Әбу ханифа» медресесі, Православ шіркеуінің Алматы діни семинариясы.
