Алматыда әр демалыс сайын карантин бола ма - әкімдік жауап берді
АЛМАТЫ. ҚазАқпарат – Алматы әкімдігі әр аптаның демалыс күндері карантин шараларын күшейте ме? Бұл сауалға Алматы әкімінің орынбасары Сапарбек Тұяқбаев жауап берді, деп хабарлайды ҚазАқпарат тілшісі.
«Шектеу шараларын бір-ақ рет енгіземіз деп үміттенген едік. Талдауға қарасақ, әлі де халық вирус жұқтырып жатыр. Жұқтыру қарқыны бәсеңдейтін түрі жоқ. Барлығы эпидемиологиялық ахуалға байланысты. Егер келесі аптада вирус жұқтыру қарқыны бәсеңдесе, қатаң карантин шаралары қолға алынбайды», - деді әкімнің орынбасары.
Сонымен қатар ол автожуу, ТҚКС, үй жанындағы дүкендер, парктер мен скверлер, жазғы дәмхана алаңдары ашық болатынын айтты.
Айта кету керек, әкімдік бүгін вирус таралу қаупі жоғары саналатын нысандарды демалыс күндері жабу туралы шешім қабылдады.
Оған дейін Нұр-Сұлтан қаласының әкімдігі осындай қаулы қабылдаған болатын.
