Алматыда ашық әдебиет мектебінде жаңа оқу жылы басталды

АЛМАТЫ. 5 қазан. ҚазАқпарат - Бүгін Алматыдағы Сапарғали Бегалин атындағы балалар кітапханасында Алматының ашық әдебиет мектебінің жаңа оқу жылының ашылу рәсімі өтті.

Ол 2014 жылдың 31мамырына дейін созылады. Онда жаңа оқу курсы қалалық мәдениет басқармасының қаржылай қолдауымен жүргізілмек. Алматының ашық әдебиет мектебінің тыңдаушылары мәртебесін түрлі шығармашылық байқаулардың жеңімпаздары атанған 50-ден астам жазушы, ақын, драматург иеленіп отыр. Онда дәрістер әрбір сенбі күндері 10-нан 18.00-ге дейін жүргізілетін болады. Курс бағдарламасына стилистика; әдебиет тарихы мен теориясы; өнер, кино және драматургия тарихы; шығармашылық психологиясы сияқты дәрістер мен тәжірибелік сабақтар енгізілген. Мектепте қазақстандық әйгілі филологтар, өнертанушылар, әдебиетшілер оқытушылық қызмет жасамақ. Сондай-ақ жыл бойы шетелдік жазушылардың шеберлік-дәрістері де өтеді деп жоспарланып отыр.