Алматыда автобус пен көлік соғылып 3 адам жараланды

АЛМАТЫ. ҚазАқпарат - Алматыда автобус пен Хюндай көлігі соғылып, 3 адам жараланды. Жол апаты Сүйінбай көшесінің бойында Саяхаттан төмен тұста болған, деп хабарлайды ҚазАқпарат.

Жол оқиғасы куәгерлерінің айтуынша, №71 автобус аялдамаға жетпей кілт тоқтаған.

Артқы жағында келе жатқан Хюндай көлігі тежегішті басуға үлгермей автобусты бір бүйірден соғып барып тоқтаған.

Жол апатынан 3 адам жапа шекті.

Автобус жүргізушісі мен жолаушы жедел жәрдем көлігімен ауруханаға жеткізілді.

Ал, ауруханаға жатудан бас тартқан кондуктор әйел кейіннен жағдайы нашарлаған соң ауруханаға кетті.

Жол апатының жай-жапсарын полиция тексеріп жатыр.