Алматыда автобустар 89 рет апатқа ұшырады
АЛМАТЫ. ҚазАқпарат - Алматыда қоғамдық көліктердің жол-көлік оқиғасы ұшырауы жиілеп кетті. Жыл басынан бері автобустардың қатысуымен 89 көлік апаты болды. Салдарынан төрт адам қаза тапты, деп хабарлайды ҚазАқпарат тілшісі.
«Биылғы жылдың үш айында мегаполисте 89 жол-көлік апаты болды. Салдарынан 4 адам қаза тауып, 105 адам түрлі дене жарақатын алды», - деп хабарлады қалалық полиция департаментінің баспасөз қызметі.
Алматы қалалық полиция департаментінің ресми ақпаратына сәйкес, 2021 жылы қоғамдық көлік жүргізушілерінің кінәсінен 264 жол-көлік оқиғасы орын алып, соның салдарынан 9 адам қаза тауып, тағы 344 адам жарақат алған. Сондай-ақ жыл басынан бері қала жолдарында мопедтердің қатысуымен 62 жол-көлік оқиғасы тіркелді. 72 адам зардап шекті. Жол қозғалысы ережелерін бұзғаны үшін мопед тізгіндеген 38 адам әкімшілік жауапқа тартылды.
Айта кетейік, D санатындағы жүргізуші куәлігі 25 жасқа толған және кемінде 5 жыл, оның ішінде D1 санаты бойынша көлік жүргізу өтілі 3 жылдан кем емес адамдарға беріледі. Алматы қалалық ІІД көлік жүргізушілеріне жол ережесін сақтап, жылдамдықты шектен тыс асырмауды еске салды.
