Алматыда азық-түлік бағасын тұрақтандыруға 9 млрд теңге жұмсалады

АЛМАТЫ. ҚазАқпарат - Алматы әкімі Бақытжан Сағынтаевтың төрағалық етуімен өткен жұмыс кеңесі барысында азық-түлік қауіпсіздігі және әлеуметтік маңызы бар азық-түлік өнімдерінің бағаларын ұстап тұру мәселелері талқыланды, деп хабарлайды ҚазАқпарат тілшісі.

Алматыда әлеуметтік маңызы бар азық-түлік тауарларының бағасын тұрақтандыру үшін шамамен 9 миллиард теңге жұмсалатын болады. Бұл қаржыны реттеу тетіктерін іске асыруға, оның ішінде қаланың сауда жүйелерінде келісілген бағамен сатылатын тауарлар желісін ұлғайтуға арналған.

Бүгінде «Maгнум» сауда желісімен әлеуметтік маңызы бар азық-түлік өнімдерін 10-нан 13 позицияға дейін ұлғайту жөнінде келісімдер жасалды. Оған қант, күнбағыс майы, сиыр еті сияқты өнімдер енгізілді. Сонымен қатар, жекелеген позициялар бойынша сауда маркаларының тізімі 10-нан 24 атауға дейін ұлғаяды. Олар: күнбағыс майы - 5, күріш - 3, жұмыртқа - 2, тауық етін сататын 4 сауда маркасын қосу келісілді. Бұлардан өзге, келісілген бағамен сатылатын өнімдердің жалпы көлемі 8,5 мың тоннаға дейін артады.

«Сабыржан Company» ЖШС-мен жасалған несиелік келісімнің аясында 2021 жылдың 1 қаңтарынан бастап «Тоймарт» сауда желісінде әлеуметтік маңызы бар азық-түлік өнімдерін 7-ден 12 позицияға дейін арттыру жоспарланып отыр. Олар - қант, күнбағыс майы, пияз, қырыққабат және айран. Сауда белгілерінің саны 7-ден 15-ке дейін өседі. Азық-түлік өнімдерінің жалпы көлемі 1,8 мың тоннаға дейін ұлғаяды.

Қабылданған шаралар ең алдымен қазіргі кезде сұранысы артқан өнім түрлеріне бағаны тұрақтандыруға бағытталған. Қала әкімі Б. Сағынтаев әлеуметтік маңызы бар өнімдер бағаларына қатысты жағдайды бақылауды әрі өнімнің күрт қымбаттауына және базардағы алыпсатарлық әрекеттерге тосқауыл қоюды тапсырды.

Айта кетерлігі, дистрибьюторлармен және өндірушілермен жалпы сомасы 2,5 миллиард теңге болатын «фьючерлік» келісімшарттар жасау бойынша жұмыстар басталды. Аталған қаржы 2021-2022 жылдардағы маусым аралығы кезеңінде 21 мың тонна көкөністі дайындауға жұмсалатын болады. Бұл жалпы тұтынудың 20%-ын құрайды.

Қазіргі кезде Алматы қаласының азық-түлікті Тұрақтандыру қорына 3,3 мың тонна өнім сатып алу жұмыстары қосымша пысықталып жатыр. Оның ішінде 2 мың тонна қант, 1 мың тонна күріш және 0,3 тонна қарақұмық бар.

Жалпы, жыл басынан бері Алматыда әлеуметтік маңызы бар өнімдердің баға индексі 110,5%-ды құрады. Әлеуметтік маңызы бар өнімдердің бағаларын ұстап тұру жөніндегі жұмыстар қала әкімдігінің тұрақты бақылауында болады.