Алматыда балалар ауруханасында 2 оттегі стансасы ашылады
АЛМАТЫ. ҚазАқпарат – Алматыда балалар ауруханасында 2 оттегі стансасы ашылады. Қалалық балалар клиникалық жұқпалы аурулар ауруханасының бас дәрігері Ержан Сералин онлайн брифинг барысында осылай мәлім етті, деп хабарлайды ҚазАқпарат тілшісі.
Алматыда балалар ауруханасының COVID-19 індетіне қарсы жабдықталуы жайлы онлайн брифинг өтті.
Ержан Сералиннің айтуынша, қазір ауруханада көлемі 8 литр болатын 25 оттегі концентраторы бар.
«Келесі айда әкімдіктің көмегімен 125 концентратор жеткізіледі. Сонымен қатар, екі оттегі стансасы салынады. Бұл біздің барлық ауруханамызды қамтуға мүмкіндік береді», - деді ол.
Аурухананың жансақтау бөлімінде 12 төсек бар. Барлық орын ӨЖЖ аппаратымен қамтылған.
«Болашақта тағы 6 аппарат сатып алуды жоспарлап отырмыз. Бұдан басқа, респираторлық қолдауға мұқтаж пациенттер үшін әрбір палатада оттегі нүктелері бар, қосымша жылжымалы оттегі аппараттарын пайдаланамыз, барлық пациенттер тиісті деңгейде қамтамасыз етілген», - деді ол.
