Алматыда баскетболдан Ұлттық лига командалары арасында Қазақстан чемпионатының үшінші тур ойындары өтуде
АЛМАТЫ. Ақпанның 5-і. ҚазАқпарат /Ерлік Ержанұлы/ - Алматыда баскетболдан XVII Қазақстан чемпионатының Ұлттық лига командаларының ерлер арасындағы үшінші тур ойындары өтіп жатыр,
деп хабарлайды ҚазАқпарат. Ақпанның 4-інде жалауы көтерілген бұл жарыста 4 кездесу өтті. Онда Атыраудың «Барыстары» Сәтбаев қаласының «Қазақмысын» (98:91), Шымкенттің «Қазығұрты» Павлодардың «Ертісін» (89:71), алматылық «ЦСКА» петропавлдың «Барысын» (109:88) ұтты. Ал алаң иелерінің екінші командасы «ЦСКА-2» қостанайлық «Тобыл-2» спортшыларына 61:73 есебімен есе жіберді. Бүгін «Тобыл-2» мен «Қазығұрт», «Барыс» пен «ТСМ»( Қапшағай), «Ертіс» пен «Алматы-2», «Барыстар-2» (Атырау) мен «ЦСКА» ұжымдары баскетбол алаңында бақ сынайды. Жарыстың бас қазысы - халықаралық дәрежедегі төреші М. Никогосян. Турнирдің ақтық ойындары жексенбі күні «Барыс» пен «Қазақмыс» және «ТСМ» мен «ЦСКА» арасында өтеді.
