Алматыда бастауыш сыныптың барлық оқушысы тегін тамақтанады

None
None
АЛМАТЫ. ҚазАқпарат – Жаңа оқу жылында Алматыда бірінші сыныпқа 31 мыңнан астам бала барды. Қала мектептерінде барлығы 317 мың оқушы білім алады, деп хабарлайды ҚазАқпарат тілшісі.

«Жаңа оқу жылынан бастап мемлекеттік мектептердің 1-4 сынып оқушылары тегін тамақпен қамтамасыз етіледі. Бұл мақсатқа жергілікті бюджеттен жыл соңына дейін 5,3 млрд теңге бөлінді», - деп хабарлады қалалық әкімдіктен.

Сонымен қатар, оқулықтар мен көркем әдебиет сатып алуға жергілікті бюджеттен 3 млрд 263 млн 457 мың теңге бөлінді.

«Биыл 2-сынып оқушылары жаңа оқулықтар алады. 1-11 сынып оқушылары да тегін оқулықтарпен толық қамтамасыз етіледі», - деп атап өтті әкімдіктен.

Сондай-ақ, мегаполисте үш ауысымды мектеп мәселесі шешілді. Осы оқу жылынан бастап Алматыдағы мектептер толықтай бір немесе екі ауысыммен білім беруге көшеді. «Мәдениет» шағын ауданында 1 500 орындық мектептің ашылуы қаладағы жалғыз үш ауысымды мектеп мәселесін шешуге мүмкіндік берді.

№191, №146, №125 мектептерге жапсаржай салу арқылы оқушылар саны 875 орынға көбейді. Жыл соңына дейін 5 мемлекеттік және 2 жекеменшік мектепті пайдалануға беру, сонымен қатар қазіргі қолданыстағы оқу орындарына үш қосымша жапсаржайдың құрылысын аяқтау жоспарға енген.

Бұған дейін Алматыда 8 жаңа мектеп ашылғаны туралы жазған болатынбыз.


Соңғы жаңалықтар
telegram