Алматыда бір тәулікте 2 мыңнан аса адам вакцинаның І компонентін алды
АЛМАТЫ. ҚазАқпарат - Алматы қаласында бір тәулікте 5882 адам коронавирусқа қарсы вакцина салдырды. Бұл туралы қалалық қоғамдық денсаулық сақтау басқармасы мәлім етті, деп хабарлайды ҚазАқпарат тілшісі.
«30 тамыз күні 5882 алматылық вакцина салдырды. Коронавирусқа қарсы екпенің І компонентін 2 050, II компонентін 3 832 адам алды. Вакцина салдырғандар саны бойынша Алматы қаласы алдыңғы орында. Биылғы жылдың 1 ақпаны мен 31 тамызы аралығында қалада 867 286 тұрғын вакцинаның бірінші компонентін, 724 837 адам екінші компонентін салдырған. Олардың ішінде 110 236 адамның жасы 60-тан асқан»,- деп хабарлады басқармадан.
Қалада 160 пункт жұмыс істеп тұр. 1 028 адамнан тұратын 237 егу бригадасы бар.
Сонымен қатар, 40 көшпелі мобильді бригада ұйымдастырылған.
«Қазір медициналық ұйымдарда, мектептерде, мәдениет, спорт объектілерінде, базарлар мен қаланың СОСО-да вакцинация пункті жұмыс істейді» - деп нақтылады денсаулық сақтау басқармасының баспасөз қызметі.
