Алматыда биыл 160 мың оқушы мектепке барады
АЛМАТЫ. 17 тамыз. ҚазАқпарат - Алматыда биылғы жаңа оқу жылында оқуға баратын 160 мың оқушының 20 мыңы бірінші сыныпта оқиды.
Бұл бүгін «Білім беру жүйесін жаңғырту - адами капиталдың сапалы өсуінің басты бағыты» деген тақырыппен өткен білім беру қызметкерлерінің тамыз кеңесінде айтылды.
«Алматыда 222 жалпы білім беретін мектеп бар. Оның 181-і мемлекеттік, 41-і жекеменшік. Мектептердің 88-і жаңа үлгіде. Ағымдағы жылы қазақ тіліндегі №177 жаңа мектеп пен 13 сынып ашылды. Мектептердің қамтылуы 1810 орынға ұлғайып, жалпы саны 70 954 адамға жетті», - деді қалалық білім басқармасының бастығы Рахат Шимашева. Оның айтуынша, енді әрқайсысы 680 орындық 2 кәсіптік мектеп салу жоспарлануда. Алдын-ала мәлімет бойынша 2015 жылы 1 қыркүйекте мектепке баратын оқушылардың жалпы саны 165 мыңға жетеді. Оның 23 мыңға жуығы бірінші сыныптағылар болмақ.
