Алматыда екі көшеде көлік қозғалысы шектеледі
АЛМАТЫ. ҚазАқпарат- Алматыда Саин көшесі мен Абай даңғылының учаскелері екі күнге жабылады, деп хабарлайды ҚазАқпарат тілшісі.
Алматы қалалық мобильділік басқармасының мәліметінше, орташа жөндеу жұмыстарының аясында асфальт бетон жабынын төсеуге байланысты 2 шілде сағат 23:00-ден 4 шілде 06:00 аралығында түнгі және күндізгі уақытта әл-Фараби даңғылының Рысқұлбеков көшесінен Дулати көшесіне дейінгі бөлігінде көлік қозғалысы толығымен шектеледі.
«Сондай-ақ жол қозғалысы Асқаров, Торайғыров, Мұстафин және қайталама Саин көшесімен жүзеге асырылады. 3 шілде сағат 23:00-ден 5 шілде сағат 06:00-ге дейін Абай даңғылының Тілендиев көшесінен Розыбакиев көшесіне дейінгі бөлігінде көлік қозғалысы толық шектеледі. Жол қозғалысы Есенжанов, Сәтбаев, Брусиловский, Тұрғыт Озал көшелерінің бойымен ұйымдастырылады»,- делінген хабарламада.
Басқарма келтірілген қолайсыздық үшін алматылықтардан кешірім сұрады.
Сонымен қатар жүргізушілерге жол жүру бағытын алдын ала жоспарлауға кеңес берді.
