Алматыда ғалым-гидрогеолог Жүрімбек Сыдықовқа мемориалды тақта орнатылды
Алматы қалалық мәдениет басқармасы басшысының орынбасары Данияр Әлиев өз сөзінде Жүрімбек Сыдықовтың Қаныш Сәтбаев, Уфа Ахмедсафин, Натай Кенесарин сынды танымал ғалымдардың ізбасары болғанын атап өтті.
Мемориалды тақта Қ.И.Сәтбаев атындағы Қазақ ұлттық техникалық зерттеу университеті жанындағы У.М. Ахмедсафин атындағы Гидрогеология және геоэкология институтының қабырғасына орнатылды. Мұнда Жүрімбек Сыдықов 70 жылға жуық жұмыс істеген.
«Ол нағыз зиялы еді, терең ғылыми білімі, ізгі ниеті мен адамгершілік қасиеттері үшін әріптестері мен замандастарының үлкен құрметіне ие болды. Оның еңбектері ғылыми қауымдастық пен мемлекет тарапынан жоғары бағаланып, марапатталды. Жүрімбек Сыдықовтың өнегелі өмірі мен жарқын бейнесі халқымыздың жадында мәңгі сақталады. Алматылықтардың атынан барша зиялы қауымды, студенттерді, ғалымның ізбасарлары мен туыстарын мемориалды тақтаның ашылуымен шын жүректен құттықтаймын», – деді Д. Әлиев.
Көрнекті ғалымды еске алуға ҚР Парламенті Сенатының мүшесі Бақытжан Жұмағұлов, ҚР Ұлттық ғылым академиясының президенті Мұрат Жұрынов, Қ. И. Сәтбаев атындағы Қазақ ұлттық техникалық зерттеу университетінің ректоры Мейрам Бегентаев келді.
Жүрімбек Сыдықов 1940 жылы қазақ орта мектебін үздік бітіріп, Екінші дүниежүзілік соғыстың басталуына байланысты әскерге шақырылған. 1944 жылы үшінші ауыр жарақаттан кейін әскерден оралып, Қазақ тау-кен металлургия институтының геологиялық барлау факультетіне оқуға түседі.
1965 жылы докторлық диссертация ретінде сәтті қорғаған Орал-Мұғалжар таулары мен Мұғалжар жазығының жерасты суларын ұзақ жылдар бойы зерттеу нәтижелері бойынша іргелі монография жазды. 35 монография, гидрогеологиялық ғылымның түрлі бағыттары бойынша 720 жұмысты жариялады.
Гидрогеология және геоэкология институтында Жүрімбек Сыдықов жасаған 124 есеп және карталар бар. Оның жетекшілігімен 11 докторлық және 25 кандидаттық диссертация қорғалды.
Майдан жылдарындағы әскери ерлігі үшін, сондай-ақ жемісті ғылыми қызметі мен ғылыми кадрларды даярлағаны үшін бірінші дәрежелі Отан соғысы орденімен, Халықтар Достығы орденімен және Қазақстан Республикасының 20-дан астам медальдарымен, басқа да құрметті наградалармен марапатталған.
Ғылым мен техника саласы бойынша Қазақ КСР Мемлекеттік сыйлығына, «Қазақ КСР еңбек сіңірген ғылым қайраткері» құрметті атағына, академик Қ.И. Сәтбаев атындағы сыйлыққа, Қазақстан Республикасы Ұлттық Ғылым академиясының үлкен алтын медаліне ие болған.