Алматыда Халықаралық есірткіге қарсы күрес күніне орай жастардың шеруі өтті
АЛМАТЫ. Маусымның 26-сы. ҚазАқпарат /Жанар Шағалақова/ - Бүгін Алматыда «Біз есірткіге қарсымыз! Салауатты өмір салты үшін!» деп аталатын ұранмен Халықаралық есірткіге және есірткі бизнесіне қарсы күрес күніне арналған жастардың қалалық шеруі өтті,
деп хабарлайды ҚазАқпарат.
Бұл іс-шара жастар арасында салауатты өмір салтын қалыптастырып, жастардың есірткіге қарсы ой-пікірін бөлісу мақсатында, қалалық әкімшілік тарапынан ұйымдастырылды. Жастар шеруіне 14 пен 19 жас аралығындағы жалпы саны 1500-ге жуық қала жастары мен жасөспірімдер қатысты.
Аталмыш шеруге қатысушылар қаланың негізгі көшелері арқылы Орталық мәдениет және демалыс саябағының концерт алаңқайына бет алды. Онда Демалыс орталықтары арасында өткен V қалалық спартакиаданың салтанатты жабылу рәсімі болады.
"Бұл жерде ұлттық спорт түрлерінен жеңіске жеткендерді және спартакиаданың жақсы өтуіне белсене ат салысқандар мен басқа да қолдау көрсеткендер марапатталады. Сондай-ақ Қазақстан эстрадасы жұлдыздарының қатысуымен гала-концерт өтеді", дейді Алматы қалалық Мемлекеттік жастар саясатын дамыту қорының маманы Венера Нұржанова.
