Алматыда италиялық экстремал велосипедпен түрлі трюктер көрсетті
АЛМАТЫ. ҚазАқпарат - Танымал велоэкстремалшы, велокаскадершы және Astana ProTeam велокомандасының бренд-амбассадоры Витторио Брумотти Қазақстанның биіктерін велосипедпен «бағындырды», деп хабарлайды ҚазАқпарат тілшісі.
Италиялық Алматының сауда үйлерінде шолу дөңгелегінің үстімен жүріп өтті. Айта кету керек, шолу дөңгелегінің биіктігі - 60 метр.
Сондай-ақ, Витторио Алматыдағы жер үсті жаяу жүргінші жолын ұмыт қалдырмады, Әл-Фараби даңғылындағы көпірдің сүйеніштерімен жүріп өтті. Ол Қазақстанда, әсіресе Алматыда бұдан кейін де вело-шоу жасайтынын айтып уәде берді.
«Менің есімім Витторио Брумотти. Мен қарапайым жарысқа түсуші емеспін, Astana ProTeam велокомандасының экстремалымын. Қазақстан бойынша қызықты шоуларымды назардан тыс қалдырмаңыздар», - деді спортшы әлеуметтік желілерде тараған бейнеролигінде.
Брумотти 2016 жылғы желтоқсан айынан бері Astana Prom Team командасының бренд-амбассадоры болып келеді. Сондай-ақ, Витторио - велотриалдан әлем чемпионы (2006 жыл). Ол бірнеше әлемдік рекордтарды орнатып, Гиннестің рекордтар кітабына енген.
Витторио Алматыдан кейін Астанаға аттанады.
