Алматыда қаланың бас жоспарына сәйкес, 6 әкімшілік орталық құрылады - Б. Байбек
АЛМАТЫ. ҚазАқпарат - Алматы қаласының бас жоспарын жүзеге асыру үшін 2030 жылға қарай 4 трлн. теңге қажет. Яғни, жыл сайын 300 млрд. теңге қажет болады. Бұл туралы бүгін Алматы әкімдігінде ҚР Премьер-Министрі Кәрім Мәсімовке қаланың бас жоспарын таныстыру барысында Алматы әкімі Бауыржан Байбек мәлім етті.
Оның айтуынша, қаланың бас жоспарын жасау барысында бір емес, көп орталық қалыптастыру саясаты жүзеге асырылады.
«Алматы қаласының бас жоспарын жүзеге асыру үшін 2030 жылға қарай 4 трлн. теңге қажет. Яғни, жыл сайын 300 млрд. теңге қажет болады. Қалада алты әкімшілік орталық болады. Олар: оңтүстік-батыс, орталық, шығыс, батыс, солтүстік және оңтүстік аймақ. Яғни, алдағы уақыта әр аймақтың тұрғыны өзіне қажетті әлеуметтік қызметтерді алу үшін қала орталығына бармай-ақ, өз аймағында, өз ауданында ала алады. Сонымен қатар, үкіметтің қолдауымен Алматының сейсмикалық сызбасы әзіреніп жатыр. Ол биыл қараша айында аяқталады. Соның арқасында қаланың кез-келген ауданының сейсмикалық күйін анықтауға қол жеткіземіз. Бұл, ғимараттар салуда бюджет қаржысын үнемдеуге мүмкіндік береді. Алматының бас жоспарын жасаудағы басты мақсатымыз - қала тұрғындарының өмір сүруіне қолайлы жағдай жасау», - деді Б. Байбек.
