Алматыда Калашников автоматын сатпақ болған ер адам ұсталды
АЛМАТЫ. ҚазАқпарат – Алматыда ер адам 3 миллион теңгеге Калашников автоматын сатпақшы болған, деп хабарлайды ҚазАқпарат Polisia.kz сайтына сілтеме жасап.
Қару саудасын қалалық прокуратураның келісімімен Ұйымдасқан қылмысқа қарсы күрес басқармасы тоқтатқан.
«Арнайы іс-шара барысында қару-жарақ сатумен айналысты деген күдікпен 42 жастағы А. есімді азамат ұсталды. Ол 5,6 мм патрондарды атуға жарамды АК-74 автоматын сатты. Қару-жарақтың нөмірі жойылған, бұл оны анықтауды қиындату үшін әдейі жасалды деп ойлаймыз. ҚР ҚК-нің 287-бабы 4-бөлігімен сотқа дейінгі тергеудің бірыңғай тізіліміне тіркелген қылмыстық іс аясында сот-баллистикалық сараптама тағайындалып, оның қорытындысы бойынша атыс қаруының қайдан алынғандығы және кімдікі екендігі анықталады», - деді Ұйымдасқан қылмысқа қарсы күрес басқармасының басшысы Жанат Нұрғалиев.
Күдікті өз ісін мойындаған. Ол уақытша ұстау изоляторына отыр.
Фото: polisia.kz
