Алматыда қандай жағдайда жаңа троллейбустар сатып алынады
АЛМАТЫ. ҚазАқпарат - Алматы қалалық мобильділік басқармасы мегаполиске қандай жағдайда жаңа троллейбустар сатып алынатынын мәлім етті, деп хабарлайды ҚазАқпарат тілшісі.
«Алматы қаласындағы троллейбус және кабель желілерін жаңғырту» жобасы аясында 6-10 кВ және 600 кабельдік желіні ауыстыру бойынша жұмыстар жүргізіліп жатыр.
«2020 жылға жоспарланған кейбір жұмыстар пандемияға байланысты 2021-2022 жылдарға шегерілді. Жаңарту аясындағы барлық жұмыс көлемі аяқталғаннан кейін, бар проблема шешілетін болады», - деп атап өтті басқармадағылар.
Алматы қалалық мобильділік басқармасының мәліметінше, бүгінгі таңда троллейбус паркінде 2013-2014 жылдары сатып алынған троллейбустар бар.
«Қазір қалада жүріп жүрген троллейбустарға сегіз жыл болды. Бюджеттен қаражат бөліне салысымен жаңа троллейбустар сатып алынады», - деп хабарлады басқармадан.
Басқарма ұсынған статистикаға сәйкес, айына орта есеппен бес рет кабельдің істен шығуы тіркеледі.
