Алматыда көліктерге су қосылған бензин құю оқиғасы тексеріліп жатыр
АЛМАТЫ. ҚазАқпарат - Алматыдағы жанармай құю станциясының бірінде көліктерге су аралас бензин құйылғаны туралы оқиға тергеліп жатыр, деп хабарлайды ҚазАқпарат тілшісі.Оқиғаның видеосы әлеуметтік желіде тарады.
Аталған мәселе бойынша ҚазАқпарат тілшісінің сауалына Алматы қаласының кәсіпкерлік және инвестициялар басқармасында жауап берді.
Ведомство мәліметінше, кешегі жаңбырдан соң «Газпромнефть» автожанармай құю станциясының бензин сақтайтын резервуарына су аққан. Бұдан кейін шамамен 10 автокөлікке су қосылған бензин құйылған.
«Қазіргі уақытта су қосылған бензин құйылған 7 автокөлік иесі мен видео авторының залалы өтелді. Сонымен қатар жанармай құю станциясын пайдалану бөлімі аталған оқиғаға тексеріс жүргізуде», - деді қалалық кәсіпкерлік және инвестициялар басқармасы.
