Алматыда коронавирус науқастары үшін қосымша төсек-орындар дайындалды
АЛМАТЫ. ҚазАқпарат – Алматыда коронавирусқа шалдыққан науқастар үшін қосымша төсек орындары дайындалды. Бұл туралы қалалық Қоғамдық денсаулық басқармасы басшысының орынбасары Светлана Сұлтанғазиева мәлім етті, деп хабарлайды ҚазАқпарат тілшісі.
«Бүгінгі күні қалада 7 045 төсек-орын бар. Жақында ғана орын саны 6 мың болған. Соңғы күндері аурудың өршуіне байланысты қосымша төсек орындары дайындалды. Резервтік төсектер Оқу-клиникалық орталығы сияқты орындарда дайындалған.
Сонымен қатар Гончарная көшесіндегі Фтизиопульмонология орталығында қосымша 100 орын құрылды. Бұған қоса, Гуманитарлық-педагогикалық колледждің ғимараттарында 300 төсек-орын дайындалды. Ертеңнен бастап «ХАК» медициналық орталығының базасында 130 орын ашылады. Тағы басқа ұйымдар да қосылуда»,- деді ол Өңірлік коммуникациялар қызметіндегі брифингіде.
Оның айтуынша, қалада 700 жансақтау орны дайындалған, олардың 310-ында науқастар жатыр. Жансақтау орындарының 44% бос емес.
Бұған дейін хабарланғандай, эпидемиологиялық ахуал нашарлаған жағдайда Алматы стационарларында орын саны 10 мыңға дейін арттырылатын болады.
