Алматыда Lexus пен мотоцикл соқтығысты
АСТАНА. ҚазАқпарат - Алматыда Lexus пен мотоцикл соқтығысты, деп хабарлады «Қазақстан байкерлері» қауымдастығынан.
Оқиға 21 тамызда Төле би мен Фурманов қиылысында сағат 01.00-де орын алды. Куәгерлердің айтуынша, мотоцикл Фурманов көшесі бойымен оңтүстік бағытқа қарай бағдаршамда жасыл белгі жанып тұрғанда өтіп кеткен. Сол сәтте Lexus көлігі бағдаршамның қызыл белгісін елемей, Төле би көшесінен бұрылып, мотоциклмен соқтығысты.
Қатты соққыдан мотоциклші бірнеше метрге ұшып барып, асфальтқа құлады. Біраз уақыт ес-түссіз жатты, есін жиған кезде бір ауыз сөз айтпады, сұраққа да жауап бермеді.
Ол ауруханаға жеткізілді. Мойны жырылып, аяғы мен қабырғасы сынған, отаны қажет етеді.
Куәгерлер Lexus көлігінің жүргізушісі мас болуы мүмкін екенін, оның зардап шекпегенін айтты.
