Алматыда Мәжіліске депутаттыққа 7 зейнеткер мен 6 жұмыссыз үміткер бар

АЛМАТЫ. ҚазАқпарат- Алматының үш сайлау округінде Мәжіліс депутаттарын сайлауда жоғары бәсекелестік болмақ. Бұл туралы Өңірлік коммуникациялар қызметінің алаңында өткен брифинг барысында Алматы қалалық аумақтық сайлау комиссиясының төрағасы Айгүл Қалықова айтты, деп хабаплайды ҚазАқпарат тілшісі.

Спикердің сөзінше, ҚР Парламенті Мәжілісі депутаттығына 2023 жылғы 20 қаңтар мен 8 ақпан аралығында Алматы қаласынан барлығы 143 кандидат ұсынылды.

«ҚР Парламенті Мәжілісінің депутаттығына барлығы 104 кандидат тіркелді. 36 кандидатты тіркеуден бас тартылды. Негізгі себептер: тиісті құжаттарды ұсынбау сондай-ақ кандидаттарға қойылатын талаптарға сәйкес келмеуі. Ал бір кандидат Мемлекеттік кірістер департаментінен декларация бойынша өте алмады. 2 адам кандидатурасын кері қайтарып алу туралы өтініш берді», - дейді Айгүл Қалықова.

Айтуынша, округтер бойынша ең жоғары бәсекелестік – № 3-ші округте 37 адам. Тіркелген үміткерлердің 73-і ер, 31-і әйел адам.

«Сондай-ақ тіркелгендердің 17-сі бюджеттік ұйымдардың қызметкерлері, коммерциялық құрылымдардың қызметкерлерінің саны – 65 адам. 7 зейнеткер, 6 жұмыссыз және 2 адам қоғамдық ұйымдардың өкілдері, қоғамдық қорлар – 4, өзін-өзі жұмыспен қамтығандар-3»,- деп атап өтті Алматы қалалық аумақтық сайлау комиссиясының төрағасы Айгүл Қалықова.

Сонымен қатар ол бір мандаттық округтер бойынша Парламент Мәжілісіне өзін - өзі ұсыну тәртібімен тіркелгендердің қатарында 91 адам бар екенінің жеткізді.