Алматыда мектептерде орын тапшылығы өсуіне басты себеп не екені айтылды

АЛМАТЫ. ҚазАқпарат - Алматыда жаңа тұрғын үйлердің салынуынан мектептегі орын тапшылығы азаяр емес. Бұл туралы өңірлік коммуникациялар қызметі алаңында Алматыдағы Әуезов ауданының әкімі Сайран Сайфеденов айтты, деп хабарлайды ҚазАқпарат тілшісі.

«Жыл басында №6, 121, 133 үш мектепке жапсаржайды пайдалануға беру мектептегі орын тапшылығын 1725 орынға азайтуға мүмкіндік берді. Алайда, көп қабатты 5 тұрғын үй кешенінің құрылысынан тапшылық бүгінде 3600 орынға дейін өсті», - деді аудан әкімі.

Оның айтуынша, бүгінде бұл олқылықтың орнын толтыру жұмыстары жалғасуда.

«Биыл мамыр айында 4 шағын ауданда 400 орындық «Достық» жеке мектебі ашылды. 1 қыркүйекке қарай мектептерге жапсарлас 1725 орындық екі қосымша құрылыс пайдалануға беріледі», - деді Сайран Сайфеденов.

Ол, сондай-ақ, келер жылы №104 мектепке 400 орындық жапсаржай салу, 1500 орындық екі жаңа мектеп пен жаңадан салынып жатқан City plus және «Белкамит» тұрғын үй кешені маңынан 800 орындық 2 балабақша тұрғызу жоспарланғанын хабарлады.