Алматыда "Мемлекеттік тілді қолдау" акциясы өтеді

АЛМАТЫ. Қыркүйектің 15-і. ҚазАқпарат /Ерлік Ержанұлы/ - Алматыда қыркүйектің 19-ы күні қазақ тілінің мемлекеттік мәртебе иеленуінің 21 жылдығына орай «Мемлекеттік тілді қолдау" акциясы өткізіледі, деп хабарлайды ҚазАқпарат.

Оны республикамыздағы партиялар, қоғамдық қозғалыстар мен жастар ұйымдарының және зиялы қауым өкілдерінің басын біріктіретін «Тәуелсіздікті қорғау» демократиялық қозғалысы ұйымдастырып отыр. Қазақтың Санжар Асфандияров атындағы ұлттық медициналық университетінің Конгресс-холлында болатын бұл шараны қолдауға «Музарт», «Серілер», «Жебе», «Жасын», «Ұлытау», «До-Мажор» топтары мен белгілі өнер шеберлері қатыспақ. Жалпы. қазақ тілі мемлекеттік тіл мәртебесін Қазақстан Республикасы тәуелсіздікке қол жеткізбей тұрған шақта, яғни, 1989 жылдың 22-ші қыркүйегінде иеленген болатын. Ұйымдастырушылар бұл акция кезінде 21 жылда Қазақстан халқын біріктіретін, олардың басын қосатын негізгі факторға толық айнала алмай отырған мемлекеттік тіл мәселесі жан-жақты талқыға түседі деп жоспарлап отыр.