Алматыда мопед мінген курьер жеңіл көлікке соқтығысып, 2 адам зардап шекті
АЛМАТЫ. Қазқпарат - Алматыда мопед мінген курьер жеңіл көлікке соқтығысып, екі адам зардап шекті, деп хабарлайды ҚазАқпарат тілшісі.
Жол апатының видеосы әлеуметтік желіде тарады.
Қалалық полиция департаментінің баспасөз қызметі мәлім еткендей, оқиға 28 наурыз күні сағат 22:00 шамасында болған.
«Мопед жүргізушісі Абай даңғылымен батыс бағытта жылжып келе жатып, Байтұрсынов көшесінің қиылысында бағдаршамның ескерту сигналына қарамастан өтіп кетпек болған. Салдарынан «Toyota RAV4» автокөлігімен соқтығысты», - деді Алматы қаласы ПД тергеу басқармасының бастығы Олжас Шәріпов.
Апат салдарынан мопед жүргізушісі мен оның жолаушысы түрлі дене жарақатын алып, ауруханаға жеткізілді.
Бұл дерек Алмалы аудандық полиция басқармасында тергеліп жатыр.
