Алматыда Нұрғиса Тілендиевтің кітаптары мен ол туралы естеліктер жинағының таныстырылымы өтеді

АЛМАТЫ. 16 сәуір. ҚазАқпарат /Ербол Азанбек/ - Бүгін Жамбыл атындағы Қазақ Мемлекеттік филармониясында Нұрғиса Тілендиевтің «Жан сәуле», «Құстар әні», «Алатау» кітаптарының және Жарқын Шәкерім, Дариға Тілендікеліні жазған «Нұрғиса Тілендиев» ғұмырнамалық деректі хикаят кітабының тұсаукесері болады.

Аса талантты композитор, Халық қаһарманының қолынан шыққан туындылары мен шығармалары, ол туралы естеліктер жинақталған кітаптар жұртшылық назарына ҚР Мәдениет министрлігі және Алматы қаласы әкімдігі қолдауымен Қазақстан Тәуелсіздігінің 20 жылдығына тарту ретінде ұсынылып отыр.

«Кітаптар Елбасы, тұңғыш Президент Нұрсұлтан Назарбаевтың бастамасымен жүзеге асырылып жатқан «Мәдени мұра» бағдарламасының аясында, дәстүрлі музыка мәдениетімізді ұрпаққа жеткізу мақсатымен шығарылды»,- дейді кітаптарды құрастырушы Дариға Тілендікеліні.

Тұсаукесер рәсіміне кітап авторлары Қазақстанның еңбек сіңірген әртісі, композитор Дариға Тілендікеліні, Қазақстан Жазушылар одағының мүшесі, Қазақстанның еңбек сіңірген қайраткері, «Құрмет» орденінің иегері Жарқын Шәкерім, белгілі қоғам және өнер қайраткерлері қатысады. Шара соңында филармонияның үлкен залында Динара Тілендиеваның дирижерлығымен Н. Тілендиев атындағы Академиялық фольклорлы-этнографиялық оркестірінің концерті өтеді.