Алматыда Орталық Азия қолөнер шеберлерінің көрме-жәрмеңкесі өтіп жатыр
«Бақыт» сәндік қолданбалы өнер орталығы ұйымдастырған бұл шара балаларды қорғау күніне арналып отыр. Оған Қазақстанның әр аймағынан келген халық шеберлері мен Тәжікстан, Қырғызстан, Түркіменстан, Өзбекстан, Ресей елдерінің 150-ден астам қолөнершілері қатысуда. Олар қала тұрғындары мен қонақтарының назарына кәдесыйлар, зергерлік, тоқыма, былғары бұйымдары, сазды аспаптар, кілемдер және бойтұмарлар ұсынуда. Екі күнге созылатын көрме-жәрмеңке кезінде балалар үйі мен интернат тәрбиеленушілері үшін «Әлем балалары сурет салады» көрме-байқауы болады. Сондай-ақ Қазақстанның суретші-шеберлері Калимхан Рахметбайқызы мен Күлән Жанғұтты «біз кесте» және «киіз басу» өнерінен шеберлік дәрістерін өткізеді. Ал Жапония мәдениет орталығының мамандары оригами және икебана өнерінің сырын ашпақ.