Алматыда өтетін Еуроодақ-Қазақстан экономикалық форумына Кипрдің іскер топтары қатыспақ
НИКОСИЯ. ҚазАқпарат – Қазақстан Елшісі Сатыбалды Бұршаков Кипр Президенті Никос Христодулидиспен кездесті, деп хабарлайды ҚазАқпарат Сыртқы істер министрлігінің ресми сайтына сілтеме жасап.
Қазақстан Елшісі Сатыбалды Бұршаков Кипр Президенті Никос Христодулидиспен әңгімелесу барысында Президент Қасым-Жомарт Тоқаевтың құттықтау хатын жеткізді. Мемлекет басшысына ізгі тілектерін жолдаған Н. Христодулидис екіжақты қарым-қатынастардың деңгейін жоғары бағалап, болашақта Қазақстанға сапармен баруға қызығушылық танытты.
Бұдан бөлек, Никосияға сапары барысында С. Бұршақов Кипрдің жаңа Үкімет мүшелері – Әділет және қоғамдық тәртіп министрі Анна Куккидис-Прокопиумен және Энергетика, сауда және өнеркәсіп министрі Йоргос Папанастасиумен келіссөздер жүргізді. Дипломат Кипр ресми өкілдерін Қазақстандағы ауқымды саяси және экономикалық реформалардың жүзеге асырылуы, сондай-ақ жуырда өткен парламенттік сайлаудың нәтижелері туралы хабардар етті.
А. Куккидис-Прокопиумен кездесуде Кипр тарапы Елшіге 2022 жылы елдеріміз арасында қол қойылған өзара құқықтық көмек және экстрадициялау туралы шарттарды Өкілдер палатасында ратификациялағаны жайлы мәлімдеді. Сондай-ақ, Қазақстан-Кипр ынтымақтастығының шарттық-құқықтық базасын одан әрі кеңейту туралы уағдаластыққа қол жеткізілді.
Энергетика, сауда және өнеркәсіп министрлігінде алдағы мамырда Алматыда өтетін Еуроодақ-Қазақстан экономикалық форумы аясында экономикалық ынтымақтастықтың күн тәртібі мен еліміздің инвестициялық әлеуеті талқыланды. Министр Й. Папанастасиу Алматыға сапары барысында қазақстандық және кипрлік кәсіпкерлердің қатысуымен өтетін бизнес-конференцияға қатысатын іскер топтардың делегациясын басқарады деп жоспарланған.
