Алматыда пандемия басталғалы коронавирустан 3 мыңға жуық адам көз жұмды
АЛМАТЫ. ҚазАқпарат – Алматыда коронавирус басталғалы бері 2 990 науқас көз жұмды. Бұл туралы қалалық қоғамдық денсаулық сақтау басқармасының бастығы Нариман Табынбаев Орталық коммуникацилар қызметінде өткен брифингте мәлім етті, деп хабарлайды ҚазАқпарат тілшісі.
«Өкінішке қарай, мегаполисте пандемия басталғалы бері 2 990 науқас көз жұмды. Оның ішінде коронавирус жұқтырғандар мен пневмониямен ауырған науқастар бар»,- дейді Алматының бас дәрігері.
Соңғы бір тәулікте қалада 423 адам коронавирус жұқтырған.
Мұның ішінде симптомды, жеңіл және орташа деңгейдегі белгілермен – 394, симптомсыз – 29 науқас тіркелді.
Бүгінгі күні инфекциялық стационарларда 1 477 адам бар (төсек-орынның жалпы саны –3 179), оның ішінде 56 бала емделіп жатыр.
Медициналық-санитариялық алғашқы көмек мобильді бригадаларының және Телемедицина орталығының амбулаториялық бақылауында 3 433 пациент бар.
