Алматыда ретро-жұлдыздар "Ретро шлягер" клубына шақырады
АЛМАТЫ. Қыркүйектің 7-сі. ҚазАқпарат /Ерлік Ержанұлы/ - Алматыда қыркүйектің 15-і күні ретро-жұлдыздар "Ретро шлягер" клубында бас қосады,
деп хабарлайды ҚазАқпарат.
"Мұрагер" продюсерлік орталығы бұл жобаны Алматы телеарнасы, Қазақ радиосы және «Ретро шлягер» клубымен бірлесіп ұйымдастырып отыр. Енді әр айдың екінші жексенбісінде ретро-жұлдыздар "Ретро шлягер" клубында бас қосатын болады. Алғашқы кешке "Алтын дән" ансамблі және Майра Дәулетбақова мен Сембек Жұмағалиев шақырылып отыр. Телеарнаға түсірілетін бұл кешке ай сайын 3-4 ретро-жұлдыздар қатысатын болады", дейді "Мұрагер" продюсерлік орталығының директоры, әнші Ералхан Әбішев. _Қазақ өнерінің өсіп-өркендеуіне үлес қосуды алдына мақсат етіп қойған өнер ордасы 2007 жылдың сәуір айында құрылған еді. Онда бұған дейін 70-80 жылдардағы өнер жұлдыздарының "Ретро жұлдыздар шақырады" деп аталатын концерттік үлкен жобасы жүзеге асырылған болатын.
