Алматыда шаңғы спортынан әлем чемпионаттары өтеді
Жасөспірімдер арасында өтетін әлем чемпионатының бағдарламасына шаңғы спортының шаңғы жарыстары, трамплиннен секіру және шаңғы қоссайысы сынды түрлері енген. Оларға қатысатын жасөспірімдер 23 жасқа дейінгілер арасында өтетін әлем чемпионатына қатыса алмайды.
«Алматы қаласының Халықаралық спорт жобалары дирекциясы» Мемлекеттік қоры баспасөз қызметінің хабарлауынша, қазіргі таңда 36 елден 500-ден астам шаңғышы чемпионатқа қатысатындарын қуаттаған. Аталмыш жарыстарда Қазақстан құрама командасы сапында 26 шаңғышы ел намысын қорғайтын болады.
Айта кетелік, бұл чемпионаттар Алматыда тұңғыш рет өткізілмек. Ұйымдастырушылардың атап өткеніндей, мұндай халықаралық деңгейдегі спорттық шараларды өткізу - жастарды қысқы спорт түрлерімен айналысуға көптеп тартуға септігін тигізеді. Сонымен қатар, олар Алматыда 2017 жылы өтетін Бүкіләлемдік қысқы Универсиада ойындарына дайындалуда маңызды қадам болмақ.
Бұл шараларды Алматы қаласының әкімдігі, Алматы қаласының халықаралық спорт жобалары дирекциясы, Қазақстанның шаңғы спорты түрлері бойынша қауымдастығы, сондай-ақ, Қазақстанның шаңғымен тарамплиннен секіру және Қазақстан Республикасының шаңғы жарыстары Ұлттық Федерациялары ұйымдастырғалы отыр.
