Алматыда сирек кездесетін дертке шалдыққан адамдарға дәрі-дәрмек тегін беріледі
АЛМАТЫ. ҚазАқпарат – Алматыда сирек кездесетін аурулары бар 500-ден астам пациент бюджет есебінен дәрі-дәрмекпен қамтамасыз етіледі. Бұл туралы мәслихаттың VII сессиясында Алматы қаласы қаржы басқармасының басшысы Қанат Сухамбеков мәлімдеді, деп хабарлайды ҚазАқпарат тілшісі.
Оның айтуынша, денсаулық сақтау саласына қосымша 3,8 млрд теңге бөлу ұсынылады. Бұл қаражаттың бір бөлігі орфандық аурулары бар адамдардың қажеттіліктеріне бағытталады.
«Сирек кездесетін (орфандық) аурулардың 8 түрі бойынша 553 пациентті тегін дәрілік заттармен қамтамасыз ету үшін 495,3 млн теңге қарастырылған», - деп нақтылады Қанат Сухамбеков.
2017 жылдан бастап жергілікті бюджет есебінен дәрі-дәрмекпен қамтамасыз етуді қажет ететін орфандық аурулары бар науқастардың саны 40 еседен астам өсті. 2017-2022 жылдар кезеңінде қаржыландыру сомасы 8 есеге артты. Сонымен қатар ол Алматыда 5 денсаулық сақтау нысанының құрылысы басталатынын айтты. Оның жобалық-сметалық құжаттамасын әзірлеуге 158,3 млн теңге қарастырылған. Орталықтандырылған зарарсыздандыру бөлімшелерін жарақтандыруға және медициналық жабдықтарды сатып алу үшін 12 медициналық ұйымға жалпы сомасы 2,3 млрд теңге бөлінеді.
