Алматыда тарихи «Мың тамшы» субұрқағы қалпына келтірілді
АЛМАТЫ. ҚазАқпарат - Алматыда Қазақ-Британ техникалық университетінің жанында орналасқан «Солтүстік» (Северный) скверіне реконструкция жасалды, деп хабарлайды ҚазАқпарат тілшісі.
Алматы әкімдігінің мәліметінше, реконструкциялау жұмыстарын Алматы қаласының экология және қоршаған орта басқармасы жүргізді.
Сквер аумағында бетон плиткалары төселді, отандық өндірістің шойын тіректері мен шамдары орнатылды, суару жүйесі қалпына келтірілді, қосымша резервуар орнатылды. Көгалдандыру жұмыстары барысында қарағай, каштан, сәндік арборвита, раушан және басқа да гүлдер отырғызылды.
«Жөндеу-қалпына келтіру жұмыстары барысында барлық құбырлар, саптамалар мен арматуралар ұзақ мерзімді пайдалану нәтижесінде істен шыққандығы анықталды. Коррозия нәтижесінде құбырларда ағын пайда болды, тұздардың тұнуы орын алды, бұл су саңылауларының бітелуіне әкелді. Осыған байланысты құбыр жүйесі мен сорғы қондырғысы, субұрқақтың жұмыс істеуін қамтамасыз ететін сыртқы желілер толығымен ауыстырылды. Субұрқақтың гранит жабыны да қалпына келтіріліп, жарықтар мен ойықтар жойылды», - деп хабарлады қалалық әкімдік.
Айта кетейік, келісімшартқа сәйкес мердігер ұйым екі жылға дейінгі мерзімге жүргізілген жұмыстарға кепілдік міндеттеме алады.
