Алматыда Тайжан Досановтың «Руника құпиясы» атты кітабы жарық көрді

деп хабарлайды ҚазАқпарат.

Аталмыш кітап «Өлке» баспасынан орыс тілінде 2000 данамен жарық көрді. Еңбек - рулық таңбалардың, кең таралған геометриялық символдардың, руникалық жазба генезисының мәселелеріне арналған. Кітаптың бірінші бөлімі Құдай аттарының этимологиясын анықтауға, ежелгі рулық терминдерге және тұжырымдамада қолданылатын негізгі сөздерге арналса, екінші бөлім жыл санауға дейінгі 3-7 ғасырда Талас өзенінің маңында өмір сүрген үйсіндердің ескерткіштері мен жазбаларындағы мәтін құпиялары, сондай-ақ Сақ жазуы құпиясы мен палеографиялық сараптаудың нәтижесі және 1974 жылы үлкен пікірталас тудыртқан Іле ескерткіш мәтінінің құпиясы ұсынылған. Кітап авторы Тайжан Досановтың айтуынша, ол ежелгі түрік генезисін зерттеуге 30 жыл еңбегін арнаған.

«Біздің ғылымда руника құпиясы туралы жазылған еңбектер аз. Бұл кітап - тұтас бір руналық тұжырымдама. Көне жазбалар - мәдениеттің көне қабаты, мәдениетіміздің тамыры. Сондықтан, біз түпкі тамырымызды білуіміз керек. Бұл еңбекті осы саладағы іргелі еңбек деп айтуға болады. Тұтас бір академияның істейтін жұмысын Тайжан Досанов жалғыз өзі істеп шыққандығының өзі ғылыми ерлікпен пара-пар», деп атап өтті таныстырылым барысында ҚазҰУ ұстазы, филология ғылымдарының кандидаты Аманқос Мектеп-тегі.

Мәдениеттанушы Әсия Маханбетованың айтуынша, бұл кітап - әлемдік маңызы бар кітап. «Автор қомақты еңбегінде руна белгілерін Менделеев кестесі сияқты, бір құрылымдық кестеге енгізе білді және оның мағынасын түсіндіріп жазды. Бұл еңбекті тек түркітанушылар ғана емес, әлемнің ірі ғалымдары, лингвистер мен филологтар, мәдениет тарихшылары зерттейтін болады», деді мәдениеттанушы Әсия Маханбетова.

Таныстырылым барысында автор Ұлттық кітапханаға кітабтың 10 данасын сыйға тартты.