Алматыда Тұңғышбай Жаманқұловтың ісі бойынша жарыссөз басталды
АЛМАТЫ. ҚазАқпарат - Алматыда «Феникс» фильмін түсіру үшін бөлінген мемлекет қаражатын жымқырды деп айыпталған Тұңғышбай Жаманқұловтың ісі бойынша жарыссөз басталды, деп хабарлайды ҚазАқпарат тілшісі.
Мемлекеттік айыптаушы істің бас сотталушысы Тұңғышбай Жаманқұловты 7 жылға бас бостандығынан айыруды және жазаны жеңілдететін мəселелерді, айыпталушының жасын ескере отырып, оны 3 жыл 9 айға қысқартып, жазасын шартты түрде тағайындауды сұрады.
Тергеу анықтағандай, «Қазақфильм» АҚ «Феникс» фильмін түсіру үшін қаражатты «Т.К.TURAN UNIVERSAL BUSINESS» ЖШС-не аударған. Қаржы қосалқы мердігерлік ұйымдар арқылы аталған компанияның құрылтайшысы әрі картинаның продюсері Т. Жаманқұловқа қолма-қол берілген. Қаржыны қолды қылуға «Қазақфильм» АҚ-ның экономика және қаржы жөніндегі басқарушы директоры Г. Ысқақова мен фильмнің атқарушы продюсері Н. Юдинаның да қатысы болғаны анықталды.
Еске сала кетейік, 2016 жылы 2 қарашада «Феникс» фильмін түсіру үшін бөлінген мемлекет қаражатын жымқырды деген күдікпен халық әртісі Т. Жаманқұловқа айып тағылған болатын.
