Алматыда учаскелерге бірінші болып келген сайлаушыларға сыйлықтар табыс етілді
АЛМАТЫ. 3 сәуір. ҚазАқпарат /Сара Мұстафина/- Алматыдағы барлық сайлау учаскелері есіктерін белгіленгендей, таңғы сағат 7.00-де айқара ашты.
Бұл туралы ҚазАқпарат тілшісіне қалалық сайлау комиссиясының төрағасы Әділ Жүнісов хабарлады.
Оның айтуынша, қаладағы барлық 467 сайлау учаскесінде салтанатты көңіл-күй орнаған. Учаскелерге бірінші болып келген сайлаушыларға ерекше назар аударылды, оларға гүл шоқтары табыс етілді.
Кәмелет жасына толып, алғаш рет дауыс бергелі отырған еліміздің жас азаматтары да, ауру-сырқауларына, жайсыз ауа-райына қарамастан, дауыс беруге келген қариялар да назардан тыс қалған жоқ. Оларға да тарту-таралғылар жасалды.
«Бұл біздің азаматтық борышымыз», - дейді бүгін ауа райы күрт бұзылғанына қарамай, дауыс беруге келген Алматының тұрғындары.
Әділ Жүнісовтың хабарлауынша, таңғы сағат 10.00-дағы жағдай бойынша Алматы қаласының 50 185 тұрғыны дауыс берді.
