Алматыда Үкіметтік емес ұйымдардың алғашқы күнтізбесі жарық көрді
АЛМАТЫ. Қаңтардың 14-і. ҚазАқпарат /Нәзира Елеухан/ - Алматыда үіметтік емес ұйымдардың 2010 жылға арналған «Он екі: ойлар, жобалар, ҮЕҰ-лар, сүйкімді тұлғалар» деп аталатын алғашқы күнтізбесінің таныстырылымы болды,
деп хабарлайды ҚазАқпарат.
Қабырғаға ілінетін күнтізбеге еліміздің үкіметтік емес ұйымдарының 12 танымал тұлғасы мен көшбасшылары енгізілген. Олардың қатарында «Астана - ҮЕҰ қолдау орталығы», Қазақстан дағдарыстық орталықтарының одақтары, «Таңсәрі» балалар театры және тағы да басқа ұйымдар мен орталықтар бар. Сонымен қатар басылымға ірі қоғамдық ұйымдардың мекен-жайлары мен сайттары енген.
«Бұл үкіметтік емес ұйымдардың алғашқы, тұңғыш күнтізбесі. Еліміздің ЕҚЫҰ-ға төрағалық етуі кезінде бұл өзекті болып табылады», деді Қазақстан Жастар медиа одағының директоры Светлана Галиева. Оның айтуынша, күнтізбе ҮЕҰ-лар жобалары мен мәселелеріне де ерекше назар аудартады.
Алматы әкімдігінің ішкі саясат басқармасының діни бірлестіктер мен ҮЕҰ-мен жұмыс жүргізу бойынша бөлім бастығы Толқын Сәметованың сөзіне қарағанда, ҮЕҰ-лардың әлеуеті жоғары және бұл бағытта қалалық билік оларға қолдау көрсетуге дайын.
Күнтізбе Қазақстан Жастар медиа одағының бастамашылығымен және «Колесо» идеялар үйінің қолдауымен жарық көрді.
