Алматыда үш мектеп қосалқы нысан арқылы кеңейтілмек

АЛМАТЫ. ҚазАқпарат- Жетісу ауданының әкімі Гүлнар Көкебаева Өңірлік коммуникациялар қызметінің брифингінде аудандағы медициналық ұйымдардың, мектептер мен балабақшалардың құрылысы туралы айтып берді, деп хабарлайды ҚазАқпарат тілшісі.

Спикердің сөзінше, «шетсіз қала» бағдарламасы аясында әр шағын ауданда білім беру, медицина нысандары, белсенді демалыс орындары ашылатын болады.

«Бүгінде «Көкжиек», «Құлагер» және «Айнабұлақ» шағын аудандарында барлығы 3 емхана бар. Онда 124 мың адамға қызмет көрсетіледі, қалған 50 мың тұрғынға шағын учаскелерге байланысты көрші аудандардың емханаларында қызмет көрсетіледі. Мемлекеттік емханалардағы ең өткір жетіспеушілік «Кемел» шағын ауданында, Саяхат автовокзалы ауданында және жұмысшы поселкесі тұрғын алабында сезілуде» - деді Гүлнар Көкебаева.

Осы түйткілді мәселені шешу үшін «Кемел» шағын ауданында күніне 200 келушіге арналған отбасылық-дәрігерлік амбулаторияның құрылысы жүргізілуде. Сонымен қатар, Саяхат ауданында 1 647 шаршы метр емхана үшін ғимарат сатып алынды, қазіргі уақытта күрделі жөндеу және емханаға қайта жабдықтау үшін ЖСҚ әзірленуде. «Құлагер» шағын ауданындағы жалпы ауданы 1 967 шаршы метр қолданыстағы емхананы кеңейту үшін үш қабатты ғимаратты күрделі жөндеуге ЖСҚ әзірлеу үшін қосымша конкурс жарияланады. Аудан әкімі оқушы орындарының тапшылығы мәселесін шешу туралы егжей-тегжейлі тоқталды. Жетісу ауданында 21 мемлекеттік мектеп бар, онда 28 525 оқушы оқиды, жалпы жобалық қуаттылығы 18 381 орын.

«Оқушылар орындарының санын арттыру үшін ауданда 1050 орындық үш мектепке жапсарлас құрылыс аяқталды. Осының арқасында оқушы орындарының тапшылығы 1,6 мың орынға дейін төмендеді», - дейді спикер. 300 орынды №148 мектеп-гимназиясында, 300 орынды № 112 жалпы білім беретін мектебінде және 200 орынды № 103 мектеп-гимназиясында қосалқы нысан салу арқылы үш мектепті кеңейту жоспарлануда. Мектепке дейінгі білім беруге қатысты Гүлнар Көкебаева Айнабұлақ шағын ауданында балабақшаға қажеттілік байқалатынын атап өтті. « Бүгінгі күні «Айнабұлақ-4» шағын ауданында 160 орынды балабақша құрылысы жүріп жатыр. Оны биылғы жылдың желтоқсан айында аяқтау жоспарланып отыр. Өткен жылы Ратушный көшесінде 280 орындық бұрынғы балабақша ғимараты сатып алынды, оны жыл соңына дейін ашу жоспарда»,- деді ол.