Алматыда ұшақтың құлауына байланысты тергеу жұмыстары басталды - прокуратура
АЛМАТЫ. ҚазАқпарат - ҚР Бас көлік прокуратурасының баспасөз қызметі Алматы маңында «Технам 2002» ұшағының құлауына байланысты тергеу жұмыстары басталғанын жариялады, деп хабарлайды ҚазАқпарат тілшісі.
«Аталған дерек Алматы әуежайының желілік ішкі істер бөлімі тарапынан сотқа дейінгі бірыңғай тергеу ісі реестріне тіркелді. Қазір ҚР ҚК 344-бабының 3-бөлімімен сотқа дейінгі тергеу жұмыстары жүріп жатыр (әуе көлігін жүргізу мен пайдалану қауіпсіздігі ережелерінің бұзылуы)», - деді баспасөз қызметінен.
Айта кету керек, төтенше жағдай бүгін болған. Алматыға жақын жерде АЗЕМ аэродромы маңында «ТЕХНАМ 2002» ұшағы апатқа ұшырады. Ұшақ 9:53-те оқу-жаттығу жұмыстары кезінде құлаған.
Бортта болған 40 жастағы ұшқыш С.Курченко мен 21 жастағы курсант Е.Әбішев оқиға орнында көз жұмды.
Әуе кемесі Азаматтық авиация академиясына тиесілі.
