Алматыда ұжымдық иммунитет қалыптаса бастады – Бақытжан Сағынтаев
АЛМАТЫ. ҚазАқпарат – Халықты жаппай вакцинациялау ұжымдық иммунитеттің қалыптасуына ықпал етуде. Бұл туралы «Алматы» телеарнасындағы тікелей эфир барысында Бақытжан Сағынтаев мәлім етті, деп хабарлайды ҚазАқпарат тілшісі.
Оның айтуынша, Алматы қаласында коронавирус бойынша эпидемиологиялық ахуал 20 қазаннан бастап тұрақтана бастады. Оптимистік болжамға сәйкес, тәулігіне 300-ге дейін жағдай тіркеліп отыр.
«Пандемия басталғаннан бері Алматыда КВИ-дің 177,2 мың жағдайы тіркелді, биылғы жылдың басынан бері – 158,7 мың адам вирус жұқтырды. дерттің апталық көрсеткіші 100 мың тұрғынға шаққанда бір апта бұрынғы 113,9-дан 89,5-ке дейін және тәуліктік өсім 0,14-ке дейін төмендеді. Оның үстіне, инфекцияның берілу индексі 0,98-ден 0,88-ге дейін азайды»,- дейді Бақытжан Сағынтаев.
Сонымен қатар, ол алдын ала жүргізілген профилактикалық шаралар коронавирустың төмендеуіне ықпал еткенін тілге тиек етті. Ең басты тиімді шара – жаппай вакциналану, соның арқасында ұжымдық иммунитеттің артуы байқалады. «Бүгінгі күні ресми тіркелген халық санының 54,4%-ын құрайды. Халықтың ресми санының 46,5%-ы екі компонентпен вакциналанды, ал жыл басынан бері ауырып жазылған адамдардың 7,9%-ы екпе салдырды»,-деді ол. Соңғы тәулікте қалада коронавирус инфекциясы 230 адамнан анықталды.
Оның 222-і симптомды. Бүгінгі күні инфекциялық стационарларда 1056 ересек адам және 28 бала ем қабылдап жатыр.
