Алматыда волейболдан әйелдер командалары арасында Қазақстан кубогының ширек финалдық ойындары өтіп жатыр
АЛМАТЫ. Қазанның 20-сы. ҚазАқпарат /Ерлік Ержанұлы/ - Бүгін Алматыда волейболдан әйелдер командалары арасындағы Қазақстан кубогының ширек финалының алғашқы кездесулері өтті,
деп хабарлайды ҚазАқпарат ҚР Волейбол федерациясының баспасөз қызметіне сілтеме жасап.
Оған 7 қаладан 8 команда қатысып жатыр. Олар - "Астана" (Астана), "Алматы" (Алматы), "Ертіс" (Павлодар), "Жетісу" (Талдықорған), "Шығыс" (Өскемен), "Металлург", "Спартак" (Теміртау) және "Грация" (Орал). Алғашқы күнгі кездесу "Астана" мен "Шығыс" (3:1), "Ертіс" пен "Қазхром"(3:0), "Жетісу" мен "Спартак" (3:0) және "Алматы" мен "Грация" (3:0) командалары арасында өтті. Октябрь Жарылқапов атындағы спорт залында өтіп жатқан бұл жарыс қазанның 27-сіне дейін созылады. Ертең "Спартак" пен "Металлург", "Шығыс" пен "Ертіс", "Грация" мен "Астана", "Жетісу" мен "Алматы" командалары кездесетін болады. Былтыр Қазақстан кубогында "Жетісу" бірінші, " Ертіс" екінші, "Астана" үшінші, ал "Металлург" төртінші орынға ие болған болатын.
