Алматыда жалдамалы пәтерден цифрлық техника мен әскери амуниция табылды
АЛМАТЫ. ҚазАқпарат – Алматы полициясы жалдамалы пәтерден цифрлық техника мен әскери қызметшінің амунициясын тапты. Бұл туралы қала комендатурасынан мәлім етті, деп хабарлайды ҚазАқпарат тілшісі.
Полиция қаладағы жалға берілетін пәтерлердің бірінен 18-25 жас аралығындағы 8 адамды ұстады. Олар Талдықорған қаласы мен Жамбыл облысынан келгендер болып шықты.
Пәтерді тінту барысында құқық қорғау қызметкерлері цифрлық техникалар: теледидар, планшеттер, моноблоктар мен әскери амуницияны тауып, тәркіледі. Ұсталғандардың айтуынша, олар бірлесе пәтер жалдап тұрады және құрылыс алаңында жұмыс істейді. Ал олардың Алматыда болудың шынайы себебі және қылмыстық оқиғаларға қатысы бар-жоғы анықталу үстінде.
Еске салсақ, бұған дейін Алматы қалалық комендатурасы Полиция департаментінің ғимаратына шабуыл алдын ала мұқият жоспарланғанын мәлім еткен болатын.
